Tan rive pou nou aji ansanm

 Tan rive pou nou aji ansanm

Okap Ayisyen, 18 avril 2026 — Parc Mémorial MUD’AIMH lanse yon apèl nasyonal bay tout aktè kiltirèl yo pou patisipe nan yon gwo tab wonn ki pwograme 21 jen 2026 nan Okap Ayisyen, nan kad lansman mouvman “Memwa Mizikal Ayiti 2030”.

Inisyativ la vize mobilize mizisyen, jounalis, sosyològ, etnològ, kritik mizikal, otorite lokal yo, pati politik yo ak fanmi atis yo pou reflechi ansanm sou kestyon sant rechèch espesyalize, rekonesans atis yo, konsèvasyon eritaj mizikal peyi a, ki dapre òganizatè yo, ap sibi yon degradasyon rapid.

“Achiv yo gaye, istwa yo pa ase dokimante, epi yon gwo pati nan patrimwàn mizikal la rete vilnerab,” dapre Abdience Obin, PDG Parc Mémorial MUD’AIMH, ki souliye ijans pou mete an plas yon estrateji nasyonal solid.

Tab wonn nan pral sèvi kòm yon espas deba ak echanj lide sou pi gwo defi ki genyen nan domèn nan, pandan yon manifès nasyonal ap prezante kòm dokiman referans pou trase gwo liy yon plan estriktire ki vize sove, òganize ak transmèt memwa mizikal ayisyen an bay jenerasyon k ap vini yo.

Òganizatè yo ensiste sou enpòtans mobilizasyon kolektif la, pandan yo raple ke “san memwa, pa gen mizik; san mizik, pa gen idantite”.

Randevou 21 jen an prezante kòm yon etap kle nan konstriksyon yon vizyon alontèm pou prezèvasyon patrimwàn mizikal Ayiti.

Ann sove ti res memwa ak achiv mizikal ayisyen yo

 AYITI-KILTI-MIZIK-MEMWA

Okap Ayisyen, 14 avril 2026 — Nan yon kontèks kote anpil tras, temwayaj, patisyon, achiv ak eritaj atis istorik yo ap disparèt, Parc Mémorial MUD’AIMH anonse jodi a lansman yon gwo mouvman nasyonal ki pote non “Memwa Mizikal Ayiti 2030”, ak objektif pou sove, pwoteje epi òganize ti rès memwa ak achiv mizikal ayisyen yo ki gaye toupatou anba je nou.

Inisyativ sa a soti nan Parc Mémorial MUD’AIMH, yon enstitisyon ki angaje nan pwoteksyon, konsèvasyon ak valorizasyon memwa ak achiv mizikal ann Ayiti.

PDG enstitisyon an, Abdience Obin, prezante pwojè a kòm yon mobilizasyon nasyonal ki vize rasanble, dokimante, dijitalize epi konsève tout eleman ki fè pati eritaj mizikal peyi a — tankou anrejistreman sonò, foto, biyografi, temwayaj ak dokiman istorik. Objektif la se konstwi yon baz done mizikal solid pou jenerasyon k ap vini yo.

Lansman ofisyèl la ap fèt nan vil Okap Ayisyen, yon espas senbolik nan listwa ak kilti Ayiti, kote anpil rasin mizik nasyonal la pran nesans. Dat lansman an fikse pou 21 jen 2026, yon dat ki koresponn ak selebrasyon entènasyonal Fèt Mizik, sa ki bay mouvman an yon dimansyon senbolik ak estratejik.

Dapre òganizatè yo, mouvman an pral chita sou plizyè aksyon kle: kolekte achiv ki gaye nan men fanmi, atis ak koleksyonnè; mete sou pye yon sant rechèch espesyalize ansanm ak yon platfòm dijital pou konsèvasyon; òganize konferans, ekspozisyon ak temwayaj piblik; ankouraje rechèch sou mizik ayisyen; epi devlope patenarya ak enstitisyon kiltirèl, medya ak otorite leta.

Responsab yo fè konnen inisyativ sa a vini kòm yon repons ijan devan menas grav k ap peze sou memwa mizikal peyi a. Mizik ayisyen — espesyalman konpa direk ak lòt ritm tradisyonèl yo — ap fè fas ak yon gwo risk disparisyon akoz mank achiv ak dokimantasyon. Anpil gwo atis deja mouri san yo pa kite okenn tras ofisyèl sou lavi ak karyè yo.

Nan sans sa a, Parc Mémorial MUD’AIMH lanse yon apèl bay tout aktè yo — atis, gwoup mizikal, pwodiktè, animatè radyo, otorite lokal, leta ak dyaspora — pou mete tèt ansanm nan yon efò kolektif pou sove memwa mizikal nasyon an.

“Mouvman sa a pa yon opsyon, se yon nesesite istorik. Se dènye chans nou pou n sove sa ki rete yo,” dapre PDG a, Abdience Obin.

Avèk lansman “Memwa Mizikal Ayiti 2030”, Ayiti antre nan yon batay kont tan pou pwoteje eritaj kiltirèl li epi anpeche istwa mizik li efase nan memwa kolektif la.